ალექსანდრე (ალიკა) წურწუმია – ხელოვანი, რომელიც ქართულ ხელოვნებასა და მომავალ თაობებს ემსახურება

საქართველოს წარმატებული ადამიანების დაჯილდოების ცერემონია „პერსონა 2026“ წლის ტიტულზე წარმოგიდგენთ მრავალმხრივ ნიჭიერ ხელოვანს, პედაგოგს, მეწარმესა და საზოგადო მოღვაწეს – ალექსანდრე (ალიკა) წურწუმიას, რომლის მრავალწლიანი საქმიანობა ქართული ხელოვნების განვითარებას, კულტურული მემკვიდრეობის პოპულარიზაციასა და ახალგაზრდების პროფესიულ აღზრდას ემსახურება.

ალექსანდრე წურწუმია 1988 წლის 17 ოქტომბერს, ჩხოროწყუს მუნიციპალიტეტის სოფელ ლეწურწუმეში დაიბადა. 2005 წელს დაამთავრა ლეწურწუმეს საშუალო სკოლა, სადაც ჯერ კიდევ მოსწავლეობის წლებში გამოავლინა განსაკუთრებული შემოქმედებითი ნიჭი. აქტიურად მონაწილეობდა ჩხოროწყუს ხელოვნების სკოლის გამოფენებში, ხოლო მისი პირველი პერსონალური გამოფენა მოსწავლეთა და ახალგაზრდობის სახლში გაიმართა, რეზო წურწუმიას, რევაზ ესართიასა და გურამ მალანიას მხარდაჭერით.

სკოლის დასრულების შემდეგ სწავლა იაკობ ნიკოლაძის სახელობის სამხატვრო სასწავლებელში, ფერწერის ფაკულტეტზე განაგრძო. 2006 წელს მოაწყო მორიგი პერსონალური გამოფენა და სწავლა ქანდაკების მიმართულებით გააგრძელა, რომელიც 2007 წელს წარმატებით დაასრულა. ამავე პერიოდში, ქეთევან გაგოშიძისა და ლევან მეტრეველის მხარდაჭერით, საფუძველი ჩაუყარა ქართული ზარების ჩამოსხმისა და მხატვრული დამუშავების საქმიანობას.

2009-2017 წლებში ალექსანდრე წურწუმია აფხაზეთის №2 საჯარო სკოლაში ხატვის პედაგოგად მუშაობდა. მოსწავლეებს ასწავლიდა ხატვას, ფერწერას, ძერწვასა და ტიხრულ მინანქარს. 2011-2012 წლებში მას პრაქტიკოსი მასწავლებლის სტატუსი მიენიჭა. სწორედ მისი ინიციატივით სკოლაში შეიქმნა სახელოსნო, სადაც ახალგაზრდები ტიხრული მინანქრისა და გალვანიკის ტექნოლოგიებს ეუფლებოდნენ.

მისი პედაგოგიური საქმიანობა არაერთი წარმატებული პროექტით აღინიშნა. ერთ-ერთ გამოფენას საქართველოს განათლების მინისტრი თამარ სანიკიძე დაესწრო, რომელსაც საჩუქრად გადაეცა მოსწავლეებისა და პედაგოგის მიერ შექმნილი მოოქროვილი წმინდა თამარის ხატი. ამავე ღონისძიებაზე წარმოდგენილი იყო ალექსანდრე წურწუმიას მიერ შესრულებული ბედის ბარძიმის ანალოგიც.

2015-2016 წლებში მან საკუთარი სახელოსნო დააფუძნა, სადაც ახალგაზრდებთან და შეგირდებთან ერთად აქტიურად განაგრძო მუშაობა გალვანიკისა და ტიხრული მინანქრის მიმართულებით. სწორედ ამ პერიოდში დაარსდა კომპანია SilverNaice, რომლის ხელმძღვანელიც დღემდე თავად გახლავთ.

2018 წელი მის კარიერაში მნიშვნელოვანი ეტაპი აღმოჩნდა — ალექსანდრე წურწუმია გახდა სახელმწიფო პროგრამის „აწარმოე საქართველოში“ გამარჯვებული. ამავე წელს გერმანელ პარტნიორებთან გაფორმებული საერთაშორისო თანამშრომლობის ხელშეკრულების საფუძველზე, მისი ნამუშევრები გერმანიასა და ყაზახეთში გაიგზავნა. დღეს იგი წარმატებით თანამშრომლობს როგორც საქართველოს, ისე უცხოეთის სხვადასხვა ორგანიზაციასთან და ქმნის ხატებს, ჯვრებს, სამკაულებსა და სხვა უნიკალურ ხელნაკეთ ნამუშევრებს.

მისი შემოქმედება არაერთ პრესტიჟულ გამოფენაზე იყო წარმოდგენილი საქართველოში და საერთაშორისო სივრცეში, მათ შორის იტალიის სხვადასხვა ქალაქში, პარიზსა და სხვა კულტურულ ცენტრებში, სადაც ქართველი ხელოვანის ნამუშევრებმა მაღალი შეფასება დაიმსახურა.

2024-2025 წლებში ალექსანდრე წურწუმიამ საერთაშორისო აღიარების არაერთ მნიშვნელოვან წარმატებას მიაღწია. იგი გახდა ლეონარდო და ვინჩის, მიქელანჯელოსა და „ვენერას“ ოქროს ქანდაკების მფლობელი, მიენიჭა ხელოვნების დიდოსტატის წოდება და და ვინჩის სახელობის საპატიო ტიტული. ამავე პერიოდში გახდა საქართველოს მხატვართა კავშირის წევრი.

განსაკუთრებული ადგილი მის საქმიანობაში განათლებას უკავია. 2024 წელს ჩხოროწყუში დააარსა უფასო ხელოვნების სასწავლო ცენტრი „შეგირდი“, სადაც დღეს 50-ზე მეტი მოსწავლე სწავლობს. 2025 წელს ცენტრის მეორე ფილიალი თბილისში გაიხსნა, ხოლო 2026 წლის 1 სექტემბრიდან მესამე ფილიალიც დაიწყებს ფუნქციონირებას, რაც კიდევ უფრო მეტ ახალგაზრდას მისცემს შესაძლებლობას პროფესიულად განვითარდეს.

ალექსანდრე (ალიკა) წურწუმიას ცხოვრება და საქმიანობა ნათელი მაგალითია იმისა, თუ როგორ შეიძლება ნიჭის, დაუღალავი შრომის, ცოდნისა და სამშობლოს სიყვარულის ერთობლიობამ შექმნას წარმატების ისტორია. იგი არა მხოლოდ გამორჩეული ხელოვანია, არამედ პედაგოგი და საზოგადო მოღვაწე, რომელიც საკუთარ გამოცდილებას მომავალ თაობებს უზიარებს და ქართული ხელოვნების განვითარებაში მნიშვნელოვან წვლილს შეიტანს.

სწორედ მრავალწლიანი შემოქმედებითი, საგანმანათლებლო და საზოგადოებრივი საქმიანობის, პროფესიული მიღწევებისა და საერთაშორისო აღიარებისთვის, ალექსანდრე (ალიკა) წურწუმია წარმოდგენილია საქართველოს წარმატებული ადამიანების დაჯილდოების ცერემონია „პერსონა 2026“ წლის ტიტულზე.